______descargar folleto das bases 2009______

 

PREMIOS LUIS TILVE 2009

A Fundación convoca os PREMIOS LUIS TILVE 2009, conforme ás consideracións xerais, contidos e bases que se indican a continuación:

Consideracións Xerais:

Os premios serán tres, denominados “TRABALLO DIGNO”, “ACCION SOLIDARIA” e “DEFENSA DO MEDIO AMBIENTE E DOS BENS COMUNS” e “INVESTIGACIÓN E DIVULGACIÓN HISTÓRICA”. Irán destinados a persoas, asociacións ou entidades que merezan ver destacado o seu traballo e premiada a súa labor, como exemplo e factor de estímulo positivo diante da comunidade galega, en relación os valores que se pretende impulsar.

O Xurado, está presidido por Fernando González Laxe, Catedrático da Universidade de A Coruña e Presidente de Honor da Fundación, e integrado por: Salvador Fernández Moreda, Presidente da Deputación Provincial de A Coruña; Álvaro Ansias Bacelar, Director Xeral de Promoción do Emprego na  Consellería de Traballo da Xunta de Galicia; Carmen Avendaño Otero, Presidenta de Érguete; Rosalía Mera Goyenechea, Presidenta da Fundación Paideia; Tareixa Navaza González, periodista; María Xosé Rodríguez Galdo, Catedrática da Universidade de Santiago; María Dolores Rodríguez Amoroso, Presidenta do Consello da Xuventude de Galicia; José Antonio Gómez Gómez, Secretario xeral da UGT de Galicia; e Roxelio Pérez Poza, Secretario da Fundación Luís Tilve.

 

Contidos:

1.- Premio “Traballo Digno”.

Distinguirá e premiará aqueles actos e realizacións que constitúan unha referencia do que debe ser un traballo digno para todos, sen diferenzas de sexo, raza, nacionalidade, relixión, ou ideas políticas.

Neste senso cabe referirse a:

1. Cuestións destacadas, conseguidas e consignadas en convenios colectivos ou pactos de empresa.         

 

1. Iniciativas de formación profesional que en calquera das súas modalidades (regrada, ocupacional, continua, etc.) destaquen como contribución a un traballo de calidade para persoas e colectivos, e axuden de xeito singular a creación ou mantemento de postos de traballo, ou a unha significativa mellora das condicións de traballo.

 

 

1. Iniciativas sindicais e empresariais que teñan servido para mellorar de xeito salientable a prevencións de accidentes, así como as medidas de seguridade e hixiene no traballo.

1. Actuacións, acordos e iniciativas para suprimir ou reducir substancialmente a contratación en precario e a eventualidade.

 

1. Persoas que a través da súa actividade profesional teñan contribuído de xeito destacado o fomento do emprego e dun traballo digno tanto no ámbito da industria, do agro ou da pesca, como no campo da docencia ou doutras actividades profesionais a través de artigos e traballos nos medios de comunicación, libros, reportaxes, ensaios ou doutros medios.

1. Iniciativas que a través do traballo axuden a unha mellor integración social de persoas ou colectivos.

 

1. Iniciativas que teñan contribuído de xeito notable á integración dos traballadores e traballadoras inmigrantes e ao recoñecemento e respecto dos seus dereitos.

1. Iniciativas que creen emprego, particularmente a través de cooperativas e pequenas e medianas empresas, respectuosas co medio ambiente.

 

2.- Premio “Acción Solidaria”.

A Unión e a solidariedade son valores históricos do movemento sindical, que as sociedades democráticas teñen asumido como propios e que a Fundación Luís Tilve quere impulsar como un ben común fronte o individualismo, as actitudes discriminatorias, clasistas ou xenófobas.

As accións solidarias son característica dos grupos humanos que avanzan a progresan. A auténtica solidariedade alimenta a convivencia xusta, o respecto político e a paz. E Fundamental, con esta orientación, compartila loita contra as inxustizas, as adversidades e as catástrofes, así como as súas causas.

Dende esta perspectiva distinguirse e premiarase calquera iniciativa que contribúa ó avance dos obxectivos mencionados. Singularmente e a modo de exemplo:

1. As accións solidarias con traballadores e traballadoras en dificultades, con motivo de folgas, peches de empresas, despedimentos, sancións inxustas, etc.

 

1. Accións concretas e eficaces de solidariedade internacional.

1. Campañas e actividades concretas para combater as causas da pobreza, das enfermidades, da explotación dos seres humanos, da guerra, etc.

 

1. Accións concretas de solidariedade coas vítimas de accións terroristas, ditaduras, mafias, abusos de todo tipo.

1. Accións eficaces de solidariedade coas vítimas de catástrofes, accidentes ou situacións de necesidade.

 

 

Aos efectos anteriores, consideraranse accións solidarias, ademais de actos ou xestos concretos, á publicación de manifestos, declaracións, artigos de prensa, programas nos medios de comunicación, organización de actividades públicas de carácter cidadán, estudios, libros, etc.

 

3.- Premio “Defensa do medio ambiente e dos bens comúns”.

A esixencia dunha actividade económica, produtiva e industrial, respectuosa co medio ambiente, é algo que se fai mais patente e xeneralizado cada día, tanto por parte dos traballadores e traballadoras como da cidadanía en xeral. É tamén unha demanda cara ao inmediato futuro. Neste senso o crecemento económico sostible é un referente estratéxico fundamental.

Ao falar de medio ambiente queremos referirnos a ese ben común, ben de todos, que non se debe converter en monopolio privado ou negocio de ninguén, como é a propia terra que habitamos: os ríos, a auga, o mar, o aire que respiramos, os bosques, a biodiversidade, os coñecementos humanos, a lingua e a cultura compartidas, as terras comunais, etc.

Tamén é importantísimo e necesario defender outros bens comúns, bens de todos, que tampouco poden converterse en particular negocio, e menos aínda monopolio. Referímonos a servizos públicos como a saúde, a educación, a seguridade social, os programas de asistencia social, a depuración e subministro de auga potable, a información, a seguridade colectiva, os ferrocarrís, os servizos postais, as cadeas, o transporte aéreo, os museos, as institucións culturais, os dereitos humanos, a atención aos maiores e aos nenos, etc.

Trátase igualmente de premiar aquelas iniciativas concretas encamiñadas a frear a ofensiva privatizadora dos bens públicos, que conduce a unha sociedade máis empobrecida, dualizada,  coas liberdades mermadas, e a propia democracia limitada e empequenecida, ameazando ao estado moderno de impotencia para facer fronte aos problemas actuais.

As posibilidades de accións concretas e iniciativas a destacar e premiar son moi amplas, e comprenden dende traballos periodísticos ate estudios rigorosos, traballos de profesionais, de alumnos, actividades culturais e de divulgación, así como tamén accións cívicas, incluídas mobilizacións e manifestacións sociais diversas, sempre pacíficas.

 

4.- Premio “Investigación e Divulgación Histórica”.

Distinguirá e premiará os estudios, investigacións ou traballos de divulgación no eido das ciencias sociais, históricas e xurídicas, relativos o mundo do traballo e da empresa, particularmente no referido ás relacións laborais, á historia das organizacións sociais, políticas e, singularmente, do sindicalismo e da súa problemática na sociedade actual, o cooperativismo, a emigración e inmigración, e en xeral canto concirne ás condicións de vida e de traballo.

Bases:

1.- Poderán optar aos premios tódalas seccións sindicais, sindicatos comarcais, unións e federacións das organizacións sindicais democráticas con presenza en Galicia. Igualmente tódalas persoas a título individual, así como calquera asociación ou entidade legalmente establecida na nosa comunidade.

2.- Poderán facer propostas tódalas persoas físicas, inclusive os membros do Xurado a título individual, así como calquera asociación, organización ou entidade legalmente establecida en Galicia.

3.- As propostas presentaranse por escrito, dirixidas a:

“Premios Luís Tilve 2009”.
Avda. Cruceiro da Coruña, nº 22, baixo.
15705 - Santiago de Compostela.
Tlf: 981 58 54 90 – Fax: 981 56 68 30.
E-mail: fluistilve@hotmail.com
http://www.fundacionluistilve.org

Facendo constar:

1. Nome, enderezo e teléfono da persoa ou entidade propoñente, ou, no seu caso, nome e datos de identificación da persoa ou entidade proposta.
2. Premio ao que se opta ou ao que se postula.
3. Informe dos feitos que motivan a proposta. (Ditos feitos non poderán ser anteriores o 1 de Setembro do ano 2007).

 

4.- A data límite para a presentación de propostas será o día 17 de maio do ano 2009.

5.- Os premios consistirán nunha figura en bronce de dúas mans entrelazadas sobre unha base de granito negro de Campolameiro, obra exclusiva do artista César Lombera, e no seu caso a publicación do traballo premiado.

6.- A entrega dos premios realizarase nun acto público que terá lugar en LUGO, o 19 de xuño do 2009.

7.- O Xurado poderá outorgar distincións honoríficas a aquelas propostas que considere merecedoras das mesmas.